काठमाडौं । राष्ट्रिय स्वतन्त्र पार्टीका सांसद शिव नेपालीले ट्रक ढुवानी व्यवसायीको समस्याबारे सरकारले ध्यान दिनुपर्ने बताउनुभएको छ । प्रतिनिधिसभाको आजको बैठकको विशेष समयमा उहाँले भारतीय ट्रक निर्वाधरुपमा मुलुकका विभिन्न भूभागमा घुम्ने गर्दा नेपाली ट्रक व्यवसायी अहिले मारमा परिरहेको बताउनुभयो । उहाँले भारतीय गाडीले उतैबाट ढुवानी गरेर ल्याउने र नेपालभित्र सबै ठाउँमा सोही गाडी घुम्ने अवस्था रहेको भन्दै भारतीय गाडीलाई भन्सार नाकामै अनलोड गरेर फर्किंने व्यवस्था मिलाउन माग गर्नुभयो । विपद् व्यवस्थापनको सम्भावित जोखिम नियन्त्रणका लागि सरकारी संयन्त्रलाई तयारी अवस्थामा राख्न पनि सांसद नेपालीले सभामुखमार्फत सरकारको ध्यानाकर्षण गराउनुभयो । सोही पार्टीका सांसद बीना लामाले धादिङको उत्तरी खण्डको सडक स्तरोन्नति गर्न माग गर्नुभयो । उहाँले रुविभ्याली गाउँपालिकाका कतिपय क्षेत्रका जोखिमपूर्ण बस्ती स्थानान्तरण गर्न पनि ध्यानाकर्षण गराउनुभयो । उहाँले भौगोलिक विकटता र स्थानीय आवश्यकताका आधारमा बजेट विनियोजन गरिनुपर्नेसमेत माग गर्नुभयो । जनता समाजवादी पार्टी (जसपा) नेपालका सांसद रेखा यादवले संसद्मा अड्किएका विधेयक चाँडो अघि बढाइनुपर्ने माग गर्नुभयो । लघुवित्तको ठगी नियन्त्रण र पीडितलाई राहत दिन सरकारको ध्यानाकर्षण गर्नुभयो । कृषकलाई कृषक परिचयपत्रको व्यवस्था गरी मलखाद्य र सिँचाइको सुनिश्चितता गराउनेतर्फ सम्बन्धित निकायलाई सक्रिय बनाउन उहाँले आग्रह गर्नुभयो । नेकपा (एकीकृत समाजवादी) का सांसद मेटमणि चौधरीले आयात निर्यातका वस्तुको सूची बनाएर ढुवानी तथा निकासी सहज तुल्याइनुपर्नेमा जोड दिनुभयो । उहाँले बैंक तथा वित्तीय क्षेत्रको पुनःसंरचना गरी दूरदराजका जनताको पहुँचमा पु¥याइनुपर्ने खाँचो औँल्याउनुभयो । सांसद चौधरीले पेट्रोलियम पदार्थको विकल्प खोजेर विद्युतीय सवारी सञ्चालनका लागि करछुटलगायतका सुविधा दिएर यसको खपतमा आकर्षण गरिनुपर्ने माग गर्नुभयो । जनमत पार्टीका सांसद अनिताकुमारी सिंहले तराई–मधेसका सरकारी विद्यालयमा आवश्यक शिक्षक दरबन्दी नहुँदा शैक्षिकसत्र अवरुद्ध भएको र शैक्षिक स्तर पनि खस्कँदो अवस्थामा रहेको भन्दै सभामुखमार्फत सरोकारवाला निकायको ध्यानाकर्षण गराउनुभयो ।
