‘झुलाघाट–चिवाभञ्ज्याङ सङ्कल्प यात्रा’को समीक्षा गर्न एमाले सचिवालय बैठक बस्दै
मिसन संवाददाता
बुधबार, पुस ४, २०८० १२:३७
‘झुलाघाट–चिवाभञ्ज्याङ सङ्कल्प यात्रा’को समीक्षा गर्न एमाले सचिवालय बैठक बस्ने भएको छ । एमाले प्रचार विभाग प्रमुख राजेन्द्र गौतमले एक दुई दिनभित्रै सचिवालय बैठक बस्ने गरी छलफल भइरहेको जानकारी दिए ।
‘सङ्कल्प यात्राको समीक्षाका लागि सचिवालय बैठक बोलाउनेबारे छलफल भइरहेको छ । एक दुई दिनभित्रै सचिवालय बैठक बस्छ । त्यसपछि यात्राको विस्तृत रिपोर्ट सार्वजनिक गर्छौ’, गौतमको भनाइ छ ।
एमालेले मङ्सिर १४ देखि पुस १ सम्म बैतडीको झुलाघाटबाट सुरु गरेको मध्यपहाडी लोकमार्ग अन्तर्गतका २६ वटा जिल्लाको यात्रा गर्दै पाँचथरको चिवा भञ्ज्याङमा पुगेर समापन गरेको थियो ।
यात्राका क्रममा एमाले नेतृत्वले मध्य पहाडका जनताका समस्या, गुनासा र सम्भावनाबारे अध्ययन गरेको बताएका छन् । सोही अध्ययन र रिपोर्टका आधारमा मध्य पहाडको विकास र त्यहाँका जनताका समस्या सम्बोधनका लागि गर्न सक्ने कामका साथै सम्भावनाबारे रिपोर्ट सार्वजनिक गर्ने एमाले नेताहरूको भनाई छ ।
