अर्थमन्त्री महतको प्रतिवेदन- अर्थतन्त्र समस्यामुक्त भइसकेको छैन (प्रतिवेदनको पूर्ण पाठ)
मिसन संवाददाता
मङ्लबार, फाल्गुन ८, २०८० १६:४३
नेपाली कांग्रेसका प्रवक्ता तथा अर्थमन्त्री डा. प्रकाशशरण महतले देशको अर्थतन्त्र समस्यामुक्त भइनसकेको बताएका छन् ।
मंगलबार ललितपुरको गोदाबरीमा जारी कांग्रेस महासमिति बैठकमा नेपालको वर्तमान आर्थिक अवस्था, सम्भावना र भावी दिशाको प्रतिवेदन पेस गर्दै अर्थमन्त्री महतले आर्थिक परिसूचक अनुकूल भए पनि राजस्व वृद्धि अपेक्षित हुन नसक्दा सार्वजनिक वित्त व्यवस्थापन चुनौतीपूर्ण भएको उल्लेख गरेका छन् ।
‘अर्थतन्त्रका अधिकांश परिसूचक सकारात्मक रहेको भए पनि वास्तविक क्षेत्रमा आर्थिक क्रियाकलापको विस्तार, उत्पादन र उत्पादकत्व वृद्धि गर्नु एक प्रमुख चुनौती हो,’ उनले भनेका छन् । अर्थमन्त्री महतले अर्थतन्त्र सुधार नहुनुमा पर्याप्त तयारीबिना बजेट प्रस्ताव ल्याउने काम पनि प्रमुख कारक भएको दाबी गरेका छन् ।
सार्वजनिक खर्च व्यवस्थापनमा गम्भीर खालका चुनौती रहेको भन्दै उनले बजेट सुनिश्चित नहुँदै ठेक्का लगाउने प्रवृत्तिले अर्थतन्त्रमा थप समस्या सिर्जना गरेको बताएका छन् । ‘अनावश्यक देखिएको संरचना खारेज नगर्ने प्रवृत्ति विद्यमान छ । वैदेशिक सहायताको उपयोग क्षमता कमजोर हुनुले उपयोग विनियोजनको औसत ५० प्रतिशत जतिमात्र छ,’ महतको प्रतिवेदनमा उल्लेख छ ।
