इंग्लिस प्रिमियर लिगमा टोटनहम ब्राइटनसँग स्तब्ध भएको छ। गएराति फाल्मर स्टेडियममा टोटनहम ब्राइटनसँग ४-२ गोलले पराजित भएको हो।
घरेलु मैदानमा ११ औं मिनेटमा ब्राइटनका ज्याक हिन्सेलवुडले सुरूवाती अग्रता दिलाए। २३ औं मिनेटमा डि-बक्सभित्र फाउल गरेपछि ब्राइटनले पेनाल्टीको अवसर पाएको थियो। पेड्रोले त्यसलाई सदुपयोग गरे।
पहिलो हाफमा टोटनहम गोलविहीन भयो। दोस्रो हाफको ६३ औं मिनेटमा फेरि ब्राइटनकै पर्भिस स्तुपिनानले गोल गरेपछि ब्राइटन ३-० को अवस्थामा पुगेको थियो।
७५ औं मिनेटमा पुनः पेनाल्टीमार्फत गोल गर्दै टोटनहमलाई ४ गोलले पछि पारेको थियो। ८१ औं मिनेटमा अलिजो भेलिज र ८५ औं मिनेटमा बेन डेभिसले गोल गरेपनि टोटनहमले हार टार्न सकेन। १९ खेलमध्ये ११ जित हात पारेको टोटनहम ३६ अंकसहित तालिकामा छैटौं स्थानमा छ। ब्राइटन ३० अंक जोडेर ८ औं स्थानमा छ।
